Leiar Fereshté Parsian i Stavanger Innvandrerråd er samd med Meling i at Stavanger Taxi må gjera alt dei kan for å finna dei ansvarlege i voldtektssakene. Likevel er ho redd frykta og stigmatiseringa berre blir verre om drosjeselskapa opnar for sjåførspesifikke bestillingar.
LES OGSÅ:
- Stavanger Taxi vil bare forsvare seg
Politiet etterforsker fem taxivoldtekter
- Fortsatt trygt med taxi
– Dersom me skal begynna å velja vekk sjåførar på grunn av kjønn eller bakgrunn, vil det skapa endå større avstandar. Dersom ein prest eller biskop i den norske kyrkja forgrip seg på nokon, betyr ikkje det at folk berre vil ha kvinnelege prestar eller biskopar, påpeiker Parsian.
Negative assosiasjonar
Ho meiner dei negative drosjeepisodane som har kome fram i media, har skapt negative assosiasjonar til ikkje-vestlege taxisjåførar over heile landet.
– No må me jobba med haldningane våre. Me må ikkje øydeleggja for dei ærlege sjåførane ved å be om kvinnelege sjåførar. Dersom me ikkje tar tak, forsterkar me dei negative normene, meiner Parsian.
Normkurs
Ho meiner drosjeselskapa må skilja mellom dei som er nye og gamle i bransjen. Parsian etterlyser eit obligatorisk kurs for nytilsette ikkje-vestlege taxisjåførar. Ho trur det kan bli enklare for sjåførane å setta seg inn i det norske samfunnet sine normer dersom dei får ei innføring før dei går inn i yrket.
– Nye ikkje-vestlige sjåførar kan fort tolka signaler frå nordmenn på feil måte. Difor må alle drosjesjåførane få eit innføringskurs for å bli kjent med det norske samfunnet sine normer. Det er kanskje for enkelt å få køyreseddel, trur Parsian.
– Flott jobb
Men ho påpeiker at dei fleste sjåførane gjer ein flott jobb, og fordrar folk til å spreie dei gode erfaringane dei har med taxisjåførar med ikkje-vestleg bakgrunn.
– Sjåførane må gjere alt dei kan for å hindra at framandfrykta får gro vidare. Ein kan ikkje begynna å skylda på at jentene var fulle eller lettkledde. Det er tross alt sjåførane sin jobb å få kundane kjem trygt heim, slår Parsian fast.
– Ikkje lov
Taxikundar har i dag ingen moglegheit for å krevja å bli henta av sjåførar med spesielle kvalifikasjonar, ifølgje nestleiar Arild Birkedal i Stavanger Taxi.
– Kundar har inga anledning til å be om kvinnelege eller etnisk norske sjåførar. Eg trur heller ikkje me ville hatt lov til å ha ei slik ordning, seier Birkedal.
Han fortel at dei nytilsette må gjennom fleire typar kurs før dei byrjar i jobben.
– Dei får ein generell innføring i holdningar og yrkespraksis. I tillegg har me starta eit samarbeidsprosjekt med utanlandske drosjeeigarar, som går på integrering, seier Birkedal.
Men han påpeiker at Stavanger Taxi vil vera varsame med å skilja mellom vestlege og ikkje-vestlege sjåførar når dei har innføringskurs.
Birkedal nektar ikkje for at det er enkelt å få køyreseddel, men påpeiker at søkjarane må gjennom mange ledd for å bli godkjent som sjåførar:
– Dei må godkjennast både av oss og av politiet. Me kan jo ikkje spå slike hendingar.
– Rasediskriminering
Dagleg leiar Tone Selkirk i Norgestaxi Stavanger fortel at dei òg har eit undervisningsopplegg for alle nytilsette sjåførar.
– Der får alle ei innføring i kva som er god oppførsel i drosjeyrket, seier Selkirk.
Ho poengterer at Norgestaxi prøver å oppfylla kundane sine ønskjer så godt det lar seg gjera.
– Folk bestemmer sjølv kva bil dei vil setta seg inn i. Men me kan ikkje etterfølgja spesifikke bestillingar om etnisk norske sjåførar. Det er rasediskriminering, påpeiker Selkirk.
Kommentarer