Betalar ut mindre i brannerstatning

- I Rogaland var det ein sterk nedgang i brannerstatningsutbetalingane i fjor. Gjennomsnittsgraden for størrelsen på brannane vart vesentleg redusert, seier kommunikasjonsdirektør Leif Osland i Finansnæringens fellesorganisasjon (FNO).

Tala frå FNO viser at forsikringsselskapa måtte ut med 354 millionar kroner i erstatning etter brann i 2010. I fjor var erstatningsutbetalinga nede i 221 millionar kroner. Sjølv om erstatningsutbetalinga går ned, går talet på såkalla varme brannar der det er flamme opp. Det var 616 varme brannar i 2010, medan talet steig til 657 brannar i fjor.

- Sidan erstatningsutbetalinga gjekk ned og talet på brannar gjekk litt opp viser det at det var færre store brannar i Rogaland i fjor. Den største nedgangen i brannar er knytt til næringslivet. I næringslivsbrannar vert det ofte store erstatningsbeløp, og når dei går ned viser det att på dei totale utbetalingane, seier Osland.

5,8 milliardar opp i røyk

På landsbasis måtte forsikringsselskapa ut med meir i fjor enn året før viser statistikk frå FNO. Dei totale erstatningsutbetalingane etter brannar i bustader og i næringslivet vart 5,8 milliardar kroner. Det er ein auke på 3,6 prosent frå året før. Erstatningsutbetalingane for bustadbrannar gjekk ned med 6,8 prosent, medan erstatningane for næringslivsbrannar auka med 12,2 prosent.

FNO listar opp levande lys, røyking, fyrverkeri, brennbare væsker, feil ved elektriske apparat og installasjonar eller feil bruk av desse som årsaker til mange brannar. På kjøkkenet er tørrkoking årsak til mange brannar og kjøkkenvifter fulle av feitt tek lett fyr om det vert varmeutvikling på komfyren. Osland meiner at førebyggjande tiltak er viktig.

- Mange av brannane kunne vore unngått om folk var flinkare til å passa på. Brannslokkingsapparatet må kontrollerast jamleg. Elektrisk utstyr må vedlikehaldas. Røykvarslarane må fungera fordi dei reddar liv. Hugs å byta batteri i varslarane. Elles er det viktig å vera varsam med open eld.

Hyttebrannar for 269 millionar kroner

Det var nedgang på 1,2 prosent til 269 millionar kroner i erstatninga for hyttebrannar i fjor. Ifølgje FNO har mange hyttebrannar samanheng med bruk av open eld.

- Brann i det elektriske anlegget, eller feil bruk av elektrisk utstyr er årsak til mange brannar. Hytteeigarar flest har eit nært forhold til verktøykassa, men når det gjeld straum er det både ulovleg og livsfarleg med for mykje sjølvgjort, seier Osland i ei pressemelding.

Gode råd mot brann:

• Monter røykvarslar. Minst éin optisk varslar i kvar etasje er anbefalt.
• Manuelt brannslokkingsutstyr er påbode og skal vera lett tilgjengeleg.
• Kontroller jamleg at brannutstyret verkar.
• Gjer deg og familien kjent med mogelege rømmingsvegar, lag rømmingsrutinar og gjennomfør brannøving.
• Avtal ein fast møteplass ved brann.
• Vurder å kjøpa ein fast brannstige om det er langt ned til bakken frå vindauge og balkong.
• Gamle teglsteinspiper vert varme under fyring og må ikkje dekkast til med teip eller liknande.
• Kaffitraktar og brødristar bør ikkje stå med støpselet i når dei ikkje er i bruk.
• Tørketromlar og vaskemaskinar bør berre nyttast når du er heime. Hugs å reingjere filtera.