- Er det vanskelegare å køyra på snø? spør Fredrik Gjerde i det han set seg i bilen.
- Kva trur du sjølv? svarar trafikklærar Olav Prestegård i G. Haugsgjerd trafikkskole.
- Det er nok vanskelegare fordi eg må tilpassa farten meir.
- Tilpassa fart er heile problemet. Du får sjå korleis den teorien du har lært fungerer i praksis.
Viktig å samarbeida
Etter Fredrik har køyrt nokre minutt kommenterer han at det kjennest ut som han køyrer i sukker. Han får testa korleis bremsane fungerer på det glatte føret i 40 kilometer i timen og får prøva seg utan ABS-bremsar. Bilen svingar frå side til side bortover vegen.
- Me starta litt hardt og tok kløtsjen fort ut, dermed vert bilen vinglete og kan sladda. Når det er snø er det viktig å ha rolege rørsler og vera mjuk på pedalane, forklarer Prestegård.
Trafikklæraren meiner folk må vera flinke å kommunisera.
- Når det er snø er det viktig å gje og ta. Me treng ikkje alltid å stå på retten vår. Det er viktig å samarbeida, seier han
Må rekna ekstra tid
Trafikklæraren meiner folk står for seint opp når dei veit det er snø.
- Alle startar på same tid som dei plar gjera. Folk må rekna med å bruka lenger tid på å køyra når det snør. Ser du at det snør når du legg deg om kvelden bør du stå opp tidlegare, seier Prestegård.
Når snøen dekkjer vegen må bilistane ta førehandsreglar. Ifølgje trafikklæraren er det viktig å skrapa bilen før du køyrer, avpassa farten til føret og køyra roleg. Han anbefaler å velja eit høgare gir for å gjera køyringa meir komfortabel. Prestegård peikar på eit blått skilt som varslar om gangfelt.
- Du ser ikkje vegmerkinga når det er snø på vegen og må dermed følgja ekstra godt med på skiltinga. Om ein person skal over gangfeltet må du bremsa i god tid og stoppa ei billengd før gangfeltet. Om bilen bak ikkje held stor nok avstand og krasjar inn i deg er det vår bil han dyttar inn i personen i gangfeltet, seier køyrelæraren.
Kommentarer