Volve ut frå Thailand

HAUGESUND: Medan produksjonsskipet «Alvheim» blir bygt ferdig i dokken hos Vetco Aibel på Risøy i Haugesund, skal produksjonsriggen til Volve-feltet skli opp på sida av «Alvheim» og gjerast klart for samankopling i slutten av neste månad.

- Det var ein føresetnad for at me kunne ta på oss jobben med Volve at fabrikasjon kunne skje ved Vetco Aibels verft i Thailand, seier adm.dir. Erling Matland i Vetco Aibel. Han legg til ingeniørarbeidet likevel er gjort i Norge.

Vetco eig og driv eit verft i Thailand som mellom anna byggjer prosessmodular for fleire produksjonsskip, som skal nyttast på andre lands soklar.

Dei to prosessmodulane til Volve blei lasta om bord i skip fredag i førre veke og skal nå vera på veg til Norge. Om lag 40 døger etter skal farkosten med Volve-modulane om bord vera framme i Haugesund.

I Haugesund skal modulane monterast om bord på den oppjekkbare riggen, til Mærsk, «Mærsk Inspirer».

- Om lag 400 personar vil vera opptekne med Volve i november, seier Erling Matland. - Dette høver godt i høve til arbeidet på «Alvheim». Der vil mykje av stål- og røyrarbeidet vera ferdig når arbeidet med Volve tar til.

Dermed kan fagfolka, både innleidde og eigne fast tilsette, flyttast over. Det blir nok fullt trøkk med minst 1000 mann inne på verftet også resten av året, seier Erling Matland.

Men neste år har Vetco Aibel likevel ledig kapasitet i Haugesund.

- Me skal tidleg på nyåret starta bygging av ein modul til Sleipner B-plattforma og ein lastebøye til Romar Technology. Me ser dessutan på fleire andre aktuelle oppdrag. Statoil planlegg utbygging av Gjøa, og BP vil byggja meir på Valhall.

BP vurderer også eit produksjonsskip (FPSO) til Skarv-feltet.

thomas.forde@aftenbladet.no