Dersom ikkje fylka og dei lokale bompengeselskapet tek fatt i dette og får ned innkrevjingskostnadene, vil det kunna verta aktuelt med eit nasjonalt bompengeselskap, seier Navarsete sin statssekretær, Geir Pollestad til Aftenbladet.
– Ser me ikkje ei klår betring, altså lågare kostnader, må me sjå om der fins andre måtar å driva innkrevjing på som kan gje resultat, legg han til.
10-12 prosent
Innkrevjingskostnadene ligg i dag på mellom 10-12 prosent i snitt.
– Det talet vil me ha ned, seier Pollestad.
Han trur mesteparten av innsparingane kan liggja på sjølve drifta av bommane. Her er det store variasjonar frå selskap til selskap. Det som skaper størst irritasjon, opplever han er administrasjonskostnader som mellom anna handlar om løn til dagleg leiar, og honorar til styremedlemmer og styreleiar.
Vegdirektoratet har gått gjennom dette, og dei konkluderer med at honoraret til styret i Nord-Jæren bompengeselskap er for høgt (148 000 kroner i 2007).
Gebyr
Nord-Jæren bompengeselskap får også kritikk for at over åtte prosent av totalinntektene, 20,6 millionar kroner i 2007, skriv seg frå tilleggsgebyr for ulovlege passeringar/feil-passeringar. Talet på klager på desse tilleggsgebyra er svært høgt.
– Dette må det gjerast noko med. Me kan ikkje finansiera vegbygging med bøter som folk ikkje kan noko for. Det er viktig at bomsystema er lagt opp slik at folk forstår dei, seier Pollestad.
Vil ta grep
– Me skal få ned innkrevjingskostnadene, så Samferdsledepartementet kan bare leggja vekk trugsmålet om eit nasjonalt bompengeselskap, seier Odd Arild Kvaløy til Aftenbladet. Sp-mannen er leiar av samferdsleutvalet i fylket og meiner det vil vera «usedvanleg uklokt» med eit nasjonalt selskap.
Det grepet Kvaløy vil ta, er å slå saman dagens fire bomselskap (Nord-Jæren, Haugalandet, Gjesdal og Finnfast) til eitt selskap.
Dei einskilde selskapa har i dag eit styre på fem til sju styremedlemmer med ein politikar som styreleiar. Kvaløy meiner det må vera nok med tre i styret, og desse bør vera folk som i dag arbeider i kommunane eller fylkeskommunen og har dette som ein del av jobben. Han tykkjer også det er meiningslaust at ein politikar skal vera styreleiar. Politikarane skal sitja i politiske organ, ikkje i aksjeselskap, som han seier.
Betring
Gebyra for feilpasseringar i bomringen på Nord-Jæren har gått ned frå 17-18 millionar kroner i 2007 til 7-8 millionar kroner, kan styreleiar Norunn Ø. Koksvik (H) fortelja. Målet er å få talet ytterlegare ned.
Det er mellom anna avgjort at dei manuelle felta skal stengja slik at systemet blir tilnærma heilautomatisk og dermed meir kundevenleg.
Påført oss
Koksvik likar dårleg at staten «stadig vekk» påfører bompengeselskapet auka driftskostnader: –.Nyleg vart det avgjort over hovudet på oss at me skal overførast frå kategori 2 til kategori ein, noko som vil føra til 1,9 millionar kroner i auka kostnader for oss, seier ho.
Honorar
Kvart av dei fem medlemmene i styret får eit honorar på 20 000 kroner, som styreleiar har ho 40 000 kroner. –.For min del kan gjerne styrehonoraret mitt reduserast, men det er opp til eigarane, altså fylkeskommunen og kommunane på Nord-Jæren å avgjera, seier ho.
Kommentarer