Høie og Kvassheim meiner Solvik-Olsen unnskyldar, bagatelliserer og bortforklarer det partileiaren sa og skuldar på media fordi han sjøl er svært ukomfortabel med partileiaren sitt bodskap og konfrontasjonsskapande retorikk.
Ikkje naiv
- Solvik-Olsen er ikkje naiv. Han veit sjølvsagt at Siv Jensen visste nøyaktig kva ho gjorde då ho spela ut Frp sitt gullkort, nemleg framandfrykt, i kjølvatnet av hijabsaka. Dersom han meiner det han seier om toleranse i Aftenblad-intervjuet, bør han våga å ta avstand frå den profilen Siv Jensen og sentrale folk i partiet står for, seier stortingsrepresentant Gunnar Kvassheim til Aftenbladet.
«Feig»
Stortingsrepresentant Bent Høie (H) synest Solvik-Olsen er feig i denne saka: - Når Siv Jensen gjekk så langt som ho gjorde, hadde eg venta det ville koma reaksjonar frå Ketil Solvik-Olsen, og fleire av dei yngre i partiet som eg opplever står for eit langt meir nyansert og tolerant syn. Dei burde ha manna seg opp og gått ut og forsvart sine standpunkt.
Pyromani
Høie og Kvassheim reagerer sterkt på det dei kallar «dobbeltkommunikasjon på høgt plan» og «politisk pyromani» i Frp:
- Dei både tenner på, og etterpå seier dei at det brenn ikkje, som Kvassheim formulerer det. Det dei viser til er dette:
Forsterkningx2
«Her er inga stor snik-islamisering i Norge», sa Solvik-Olsen. Same dag forsterka Frp Siv Jensen sitt bodskap om at «virkeligheten er at det foregår en snik-islamifisering» ved å gå ut med ei liste med tolv såkalla minoritets-særkrav som dei meinte skulle visa at Jensen har rett. Og i går gjekk partiet sin innvandringspolitiske talsmann, Per Willy Amundsen, ut i Aftenposten og sa at «Sannheten er at vi går i retning av et muslimsk samfunn. Det er ingen tvil om det. » Amundsen argumenterer mellom anna med at Oslo i 2029 vil ha eit fleirtal av ikkje-vestlege innvandrarar.
Spagat
- Det må vera grenser for kor lenge Solvik-Olsen skal prøva å framstå som tolerant, nyansert og seriøs samstundes som han vil leva godt på alle stemmene partiet hankar inn på å vera det motsette, seier Kvassheim.
Siv Jensen og Per Willy Amundsen bles jo vekk nyansane, dei teiknar eit overforenkla og tydeleg bilete for å skapa framandfrykt. Amundsen sin påstand er absurd. Dette går ikkje i hop, påpeikar Kvassheim og Høie.
Oppgjer
Korkje Høie eller Kvassheim har oppfatta at Frp nokon gong har teke noko oppgjer med framandfrykt og fordommar slik Solvik-Olsen seier partiet stadig vekk gjer.
- Siv Jensen har ved alle viktige krossvegar vald ei linje som forsterkar motsetnader og bygd opp under dei-oss-argumentasjon og undergravd arbeid personar med innvandrarbakgrunn i Norge gjer for å byggja bru, seier Høie.
No problem
Særkrav-lista Frp har kome med, meiner Høie slett ikkje viser at her går føre seg noko snik-islamisering: - Desse krava er ikkje problematiske. Det er relevante ønskje frå folk som bur i Norge som har ein annan religion og som ønskjer å utøva den.
- Me vestlendingar veit at det går fint at folk med ulike religiøse standpunkt og praksis kan få leva og praktisera som dei vil. At kvinnene i Smiths Venner går i skjørt og har langt hår, trugar ikkje storsamfunnet. På same måte som det er ingen fare for storsamfunnet at muslimske fangar får halalkjøt i fengselet, og vegetarianarar slepp å eta kjøt, seier Høie vidare.
Fransk
Høgremannen vil at Norge skal halda fast på den norske modellen kor me i stor grad har hatt aksept for at ulike religionar og verdiar lever parallelt med kvarandre i eit mangfald.
Han ser klare teikn på at Frp går i retning av den franske modellen kor alle fellesarenaer er frie for religiøse uttrykk.
Diskriminering
- Men Frp vil då ikkje fjerna kristendommen frå det offentlege rom?
- Nei, det er der det blir diskriminering. Då kjem det fram at det er islam Frp vil overvunne. Då kan dei ikkje samstundes seia at dei står for full religionsfridom, seier Høie.
Kommentarer