– Dra til Brasil nå!

– Det tar til å hasta med etablering i Brasil. Greier du det ikkje i løpet av dei neste to åra kan du berre gløyma det.

AV: thomas førde

Det er Johnar Olsen som seier dette. Han er truleg ein av dei som kjenner norsk leverandørindustri i Brasil aller best. Olsen er sjølv brasiliansk statsborgar, men han har arbeidd for norske oljeserviceselskap, mest for Kværner og sidan for Aker, i Brasil dei siste ti åra.

I fjor jobba han ved Intsok-kontoret i Rio. Nå skal han etablera Scana si verksemd i Brasil og held til i eit norsk inkubatormiljø i Rio, eit miljø som han også har vore med å etablera. Olsen er dessutan styreleiar i det norsk brasilianske handelskammeret i Rio.

Johnar Olsen peikar ut dei fremste utfordringane som norske verksemder møter ved etablering i Brasil:

Ein stor kunde: Som leverandør innan olje- og gassindustrien må ein oftast forhalda seg på godt og vondt til ein stor kunde. (Petrobras). Leverandørmarknaden er lite mogen.

Skatt: Brasil er eit av dei verste landa i verda med komplisert uoversiktleg skattesystem. Mange ulike skattelovar oppå kvarandre slik at nye firma treng eksperthjelp.Brasil krev proff rekneskapsførar frå første dag hos nye firma. Mange ulike skattar å halda greie på og stadige regelendringar å oppdatera seg på. Dette må Brasil gjera noe med!

Tolldeklarering: Ei av dei største utfordringane for alle selskap.

Produktiviteten: Er for låg og må betrast. Krav om stort lokalt innhald. Vansklege å budsjettera. Mye blir dyrare enn tenkt når alt tar lengre tid.

Kulturen: Må ein læra seg, samt språket portugisisk. Men må i alle høve ha ein person nær toppleiar som kan språket. Planlegging er ikkje i vokabularet.

Korrupsjon: Lite i oppstraumsida i oljeindustrien. Men når det kjem til nedstraumsaktivitetar og vedlikehald opptrer det oftare. Mye er avslørt av media i internasjonalt næringsliv. Kjem seg også i Brasil. Men altfor utbredt i dag i næringsliv og i politikk.

Fattigdom: Favelaene (dei fattige buområda) tar det minst to generasjonar å bli kvitt. Fem prosent av folket har ei dagsinntekt på under fem dollar per dag.

Utdanning: Manglar hos for mange og skulesystemet er for dårleg. Mellomsjiktet av ingeniørar og teknisk fagpersonell finst nærast ikkje. Flest ufaglærte og nokre med mastergrad.

Hastar: Det er alt seint å etablera seg i Brasil. Dersom ein ikkje får til noe i løpet av dei neste to åra, kan ein berre gløyma det. Dersom norske bedrifter sviktar vil verksemder frå USA, Storbritannia og Nederland gripa sjansen.