Obamas westernfavoritt

FILM: «Old Henry» er ein av Barack Obamas filmfavorittar. Det er lett å forstå.

Gamle Henry kan meir enn å dyrka jord, skal det visa seg i Barack Obamas favoritt «Old Henry».
  • Jan Zahl
    Jan Zahl
    Kulturjournalist
Publisert: Publisert:
Grade: 5 out of 6

OLD HENRY

Kinopremiere: 03.06.2022. Med: Tim Blake Nelson, Stephen Dorff, Trace Adkins, Scott Haze, Gavin Lewins. Sjanger: Action / Thriller / Western. Regi: Potsy Ponciroli. Nasjonalitet: USA, 2021. Aldersgrense: 15 år. Lengde: 1 time, 39 minutt.

Tidlegare president Barack Obama er jo ein kul fyr. Blant anna fordi han også er ein kulturfyr. Ein lesar. Ein som lyttar til musikk. Ein som ser film. Og når det går mot slutten av året, deler han på sosiale medium kva bøker, musikk og filmar han likte best i året som gjekk.

På Obamas liste over beste filmar frå 2021: Lågbudsjettwesternen «Old Henry», som hadde premiere på filmfestivalen i Venezia i fjor og som kjem til Stavanger denne helga.

På ein bortgøymd gard i Oklahoma bur bonden Henry (Tim Blake Nelson) saman med tenåringssonen Wyatt (Gavin Lewis). Ein dag finn Henry ein hardt skada mann – og ei salveske full av pengar. Henry tek mannen – og veska – med seg heim. Men han utset dermed også både seg sjølv, sonen og den framande for fare. For nokon er tydelegvis på jakt etter den skadde mannen og pengane hans. Og kven er eigentleg mannen, jegerane – og Henry sjølv?

Manusforfattar og regissør Potsy Ponciroli har kalla filmen sin ein mikro-western. Her er ikkje så veldig mange karakterar, så mange locations eller grandios scenografi. Eller, forresten: Naturen i Oklahoma om hausten utgjer den mest storslegne scenografien du kan ønska deg, mens garden ser akkurat så fattigsleg, primitiv og autentisk ut som ein kunne venta av eit slikt småbruk i 1906.

Om karakterane er få, spelar dei til gjengjeld knakande godt, på sitt fåmælte, mistruiske, breie westernspråk. Ikkje minst Tim Blake Nelson, som du har sett før i mange filmar, som i Cohen-brørnes «O Brother, Where Art Thou?». Gjerne i litt komiske og/eller stakkarslege roller.

Men rolla som Henry er alt anna enn komisk eller stakkarsleg. Nelson spelar ein mann som tydelegvis har ei fortid som noko anna enn ein bonde som står og grev grøfter. Me aner det både gjennom det han seier og det han gjer, samtidig som det dukkar opp stadig fleire hint om at gamle Henry har opplevd både dette og hint.

Samtidig kjempar han ein kamp med seg sjølv for å halda fast i denne identiteten som hardtarbeidande og fredeleg bonde. Og, ikkje minst, det inderlege ønsket om å oppdra sonen til å bli eit godt menneske. Den tanken prøver han også å halda fast i når vondskapen kjem ridande inn på gardsrommet og tøffe val må takast.

Liker du ein velspelt, ganske intim og ganske røff western – som Obama – bør du sjå «Old Henry».

Publisert:

Film- og tv-anmeldelser

  1. Denne filmen om ungdommeleg rå­skap og venn­skap bur du sjå

  2. Musikalsk og visuelt fyrverkeri om Elvis

  3. Charlotte Rampling briljerer som alkoholisert og kjip bestemor

  4. Vår anmelder om enda en Jurassic-oppfølger: Nå må det være nok!

  5. Er alle menn like?

  6. Dette er Obama sin favoritt-western. Det kan eg godt forstå

  1. Film- og tv-anmeldelser
  2. Anmeldelse
  3. Filmanmeldelse
  4. Western
  5. Film