— Gratulerer!

— Takk!

— Dette var stas?

— Det er heilt fantastisk. Eg har gått og smilt ei stund nå.

Stavangerske Lene Ask er på telefonen frå sitt austlandske eksil – igjen. Sist ringte me for å snakka om den nye teikneserieromanen "Neste gang blir alt riktig", som kom ut før jul. Her tek Lene Ask opp det kompliserte forholdet mellom mor og dotter.

Godt grep

Då me ringte sist, sa Lene at ho følte ho hadde gjort sitt, at boka hadde blitt fin – og at håpet var at folk ville kjøpa og lesa. Nå vinn ho altså Kulturdepartementets teikneseriepris.

"Ask har et godt dramaturgisk grep om fortellingen og beskriver mennesker med stor troverdighet. Med en naivistisk strek og en bevisst fargeholdning beveger hun seg uanstrengt mellom livets små og store spørsmål. En stillferdig fortelleteknikk gir rom for ettertanke og refleksjon," seier juryen om prisvinnaren.

Ask vant same pris for debutboka "Hitler, Jesus og farfar" i 2006. Som heile Rogaland leste då 50.000 eksemplar blei delt ut gratis i heile fylket i 2011.

— Du har ganske godt tak på prisvinning og å bli valt til prestisjetunge greier?- Ja, eg føler eg kan det nå. Eg føler at denne gongen blei alt riktig.

Betyr mykje

Faktisk kjennest det endå riktigare og gøyare denne gongen.

— Eg visste ikkje heilt kva det ville seia å få ein slik pris då eg fekk han sist, sidan eg aldri hadde gitt ut bok før. Nå veit eg at det har ganske mykje å seia for levetida på boka: Fleire får vita om henne, fleire vil lesa.

— Så prisen betyr meir enn 35.000 kroner på konto og ein god porsjon ære?

— Pengane er bare ein bonus. Det som betyr noko er at folk les boka. Sjølv om pengane jo er velkomne...

Ny barnebok

Samtidig med at Lene får ny pris, er ho aktuell med tredje bok i serien om tvillingane Jo og Jenny: "Jo og Jenny feirer bursdag". Biletbokserien er for barn frå tre til seks år.

— Den har eg ikkje fått noko pris for. Ennå. Eg har noko å strekkja meg etter der, ler Lene.

— Tenkjer du veldig forskjellig når du lagar biletbøker for små barn og ein teikneserieroman?

— Det er ikkje veldig stor forskjell. Men med Jo og Jenny tenkjer eg veldig mykje på målgruppa. Språkleg må det dreia seg om ting ungar på den alderen er opptekne av, og så må det kunna forståast av dei små. Då eg laga teikneserieromanen, tenkte eg ikkje alder i det heile tatt. Sånn sett er det litt misvisande med barne- og ungdomspris, sidan eg ikkje ser teikneserieromanen som ein barne- og ungdomsroman. Det var heller ikkje "Hitler, Jesus og farfar".

Vinnarane

Kulturdepartementet delte ut fleire prisar onsdag. Arne Svingen fekk Litteraturprisen for "Sangen om en brukket nese". Kenneth Steven og Øyvind Torseter fekk Bildebokprisen for "Historia om korleis hunden fekk våt snute", mens Fagbokprisen gjekk til Jon Ewo for "Norske konger og dronninger". Marianne Kaurin fekk Debutantprisen og "Nærmere høst", mens Trond Bredesen fekk Illustrasjonsprisen for illustrasjonane i seien "Kunstdetektivene".