Kommentar: Brages nye verd

Mor til Brage er bekymra for mobbing. Ho kjøper ei smartklokke til sonen på 12.

Publisert: Publisert:

Smartklokka kan vera eit overvakingsapparat til glede for nokon, men til bekymring for skulefolk på Sørlandet. Ny teknologi utfordrar personvernet. Foto: Sergey Peterman / Shutterstock

Helga som kjem er det fylkesårsmøte i to så tilsynelatande ulike parti som Rogaland Venstre og Rogaland Frp.

No er dei rett nok på same borgarlege side, men på fylkesårsmøtet til Venstre på Sola vil du garantert få nokre kvasse og velformulerte utfall mot innvandringsminister Sylvi Listhaug (Frp).

Og i Haugesund vil nok nokon frå Frp hissa seg opp over mikropartia som konsekvent har støtta dei blå-blå gjennom heile perioden.

Les også

Horne listetopp for Rogaland Frp

Alt dette vil du få lesa og sjå meir om sidan.

Lat oss heller tenka på Brage.

Han er altså 12 år gamal og vert mobba, fysisk og psykisk. Han kjem heim med sekken full av jord og utan bøker. Dei ligg i grøfta ein stad.

Skulen tek ikkje tak, meiner mor.

Ho kjøper ei smartklokke.

Forbodet

Ei slik som skular i Kristiansand vurderer å forby.

Orsaka til forbodet er mellom anna at du veit aldri kven som lyttar når du har på deg ei smartklokke. Brått vert læraren rabiat og skjeller ut klassen, men kven treng å vita det når elevane trass alt har respekt for ho?

Difor vil oppvekstdirektøren i Sørlandets hovudstad nekta skulebarn å ha smartklokker i klasseromma. Klokkene skal ligga avslått i sekken. Ifølgje Fædrelandsvennen skuldast det frykta nett for at foreldre og føresette skal overvaka undervisinga.

Nokre smartklokker gjer det nemleg mogleg å kopla opp samtalar utan at eleven sjølv trykkar på «aksepter samtale».

Eller at du aldri veit når smartklokka er eit kamera og klikkar inn klassekameraten naken i dusjen eller gråtande på fotballbanen. Før du legg han ut på ein høveleg stad å publisera.

Gode hensikter

Men mor til Brage har berre gode hensikter. Ho vil vita kva som skjer rundt sonen før han kjem heim gråttung og med raude augo.

Med den nye klokka kan ho følgja han steg for steg. Ho høyrer alt frå klassekontakten seier god morgon til Brage ligg i grøfta og leitar etter bøkene sine.

Noko ser ho også.

Så gret ho. Og ringer rundt.

Varslaren

Er det feil dette?

Edward Snowden er varslaren som i 2013 slapp ut store mengder med CIA-dokument.

Han fortalde oss kor omfattande overvakinga av oss eigentleg er. Har du ein smarttelefon i lomma eller ei smartklokke på armen, har du i realiteten sagt frå deg retten til eit privatliv, meiner vinnaren av Bjørnson-prisen 2015.

Og dette er alt før mor til Brage kjøper eit lite overvakingsapparat til å følgja han 24/7.

Slik at du har eit ørlite val alt no, lenge før september 2017.

Du kan jo tru på det gode i menneska og på at me alle har lite å løyna. Dei fleste av oss er ikkje terroristar og omtrent ingen - unnateke ein av sju milliardar - er Anders Behring Breivik.

Ja, nei, nei, nei

Me likar ikkje overvaking anten det er amerikanske NSA (National Security Agency) eller heimlege PST som står for det.

Eller du kan tenka at me er omgitt av fiendar og at meir overvaking er svaret. Og at det kunne ha spart oss for så mykje elende.

Nokon vil ta oss. Me må ta dei først.

Eg har ikkje svaret.

Men eg vil tru at Venstre og Frp sine fylkesårsmøte skil lag også på dette punktet.

Så eg gler meg.

Til helga.

Fordi politikk til sist er så smått og stort. Akkurat no grev Brage rundt etter bøkene sine mens mor har fyrt opp smartklokke-overvakinga.

Alle feila som vart gjort

Er det feil?

Eit av dei store skilja i 2017 er mellom dei som vil ha endå meir sensur, endå meir tankekontroll, endå meir overvaking av allereie ganske skremmande opne prosessar. Og dei naive.

Heim i lommen

Dersom du som meg er eit aldrande fossil, vil eg tilrå å sjekka ut appen Picket.

Picket vil gjera din gamle smartmobil eller nettbrett til eit herleg overvakingsapparat.

Du kan passa på ungar og kona og katten og hunden.

Du kan få bilete og elles følgja med på det meste.

Og alt går via eit nett som USA har tilgang til direkte, Russland eventuelt via hacking. Hurra!

PS: Brage kjem heim seint onsdag kveld og melder til mor at han har mista klokka. Han blør frå lippa. Alle namn her er endra for å skjerma dei uskuldige. Tittelen og Brage er utelukkande eit ordspel på «Brave new world».

Publisert: