Kristoff slått i spurten – tok NM-sølv

Alexander Kristoff var med i gullkampen på oppløpet i sykkel-NM, men klarte ikkje å hamle opp med Rasmus Tiller dei siste metrane.

Etter dryge 190 kilometer på sykkelsetet var det om lag 10 løparar som skulle spurte om gullet på NM-fellesstarten.

Alexander Kristoff, Edvald Boasson-Hagen og Rasmus Tiller var side om side dei siste metrane, men det var Tiller som kunne strekke hendene i været og juble etter målpassering. Kristoff var om lag ei sykkellengde bak Tiller, og sneik seg føre Boasson-Hagen som tok bronsemedaljen.

Sven Erik Bystrøm, Kristoffs lagkamerat i Intermarché-Wanty-Gobert Matériaux, kom i mål som nummer 11 etter å ha gjort ein god jobb for Kristoff undervegs i dagens løp.

Stjerneskotet Per Strand Hagenes frå Sandnes, som berre er 18 år, sykla ein sterk fellesstart og blei nummer 13, vel halvminuttet bak vinnaren.

Feltet under dagens NM-øvelse bestod av fleire ryttarar som skal til Tour de France om ei knapp veke. Blant dei Alexander Kristoff.

1. juli startar det som for mange er årets høgdepunkt med tre etappar i Danmark før touren held fram i Frankrike og etter kvart blir avslutta på Champs-Élysées.